ନୂଆଦିଲ୍ଲୀ,୩୧/୦୩: ସାରା ବିଶ୍ବରେ ଗ୍ୟାସ୍ ସିଲିଣ୍ଡର ସଙ୍କଟ ଦିନକୁ ଦିନ ଗମ୍ଭୀର ହେଉଥିବାବେଳେ ଏହାରି ଭିତରେ ଏବେ କେନ୍ଦ୍ର ସରକାର ବଡ଼ ନିଷ୍ପତ୍ତି ନେଇଛନ୍ତି । କେନ୍ଦ୍ର ସରକାର କିରୋସିନକୁ ପୁଣିଥରେ ଆଣିବା ପାଇଁ ନିଷ୍ପତ୍ତି ନେଇଛନ୍ତି । କିରୋସିନ ବିକ୍ରି ଉପରେ ପ୍ରତିବନ୍ଧକ ହଟାଇ ଦିଆଯାଇଛି ଏବଂ ୬୦ ଦିନର ଅବଧିକୁ ବଢ଼ାଇ ଦିଆଯାଇଛି । ଏବେ ପେଟ୍ରୋଲ ପମ୍ପରେ ପୂର୍ବ ପରି କିରୋସିନ ବିକ୍ରି ହେବ । ୨୧ଟି ରାଜ୍ୟରେ ସାଧାରଣ ବଣ୍ଟନ ବ୍ୟବସ୍ଥା ଅଧୀନରେ କିରୋସିନର ଆଡ-ହକ୍ ଯୋଗାଣ ଆରମ୍ଭ ହୋଇଛି ଏବଂ ଖୁବ୍ ଶୀଘ୍ର କିରୋସିନ ବିକ୍ରି ପୁଣିଥରେ ଆରମ୍ଭ ହେବ । ସରକାର ଅନୁମାନ ଲଗାଉଛନ୍ତି ଯେ ହର୍ମୁଜ୍ ପ୍ରଣାଳୀରେ ବଢ଼ୁଥିବା ଉତ୍ତେଜନା ଗ୍ୟାସ୍ ଯୋଗାଣକୁ ଆହୁରି ବାଧାପ୍ରାପ୍ତ କରିପାରେ । ଏହି ସଙ୍କଟର ସମାଧାନ ପାଇଁ କିରୋସିନ ଉପରୁ ପ୍ରତିବନ୍ଧକ ଉଠାଇ ଏହାକୁ ବିକ୍ରି କରିବାକୁ ନିଷ୍ପତ୍ତି ନିଆଯାଇଛି । ଏହାଦ୍ବାରା ଗ୍ରାମାଞ୍ଚଳରେ ଘରକୁ ଘର କିରୋସିନ ଯୋଗାଇ ଦିଆଯିବ । ଏହାକୁ ହାସଲ କରିବା ପାଇଁ ପେଟ୍ରୋଲିୟମ୍ ସୁରକ୍ଷା ଏବଂ ଲାଇସେନ୍ସ ନିୟମକୁ ଅସ୍ଥାୟୀ ଭାବରେ କୋହଳ କରାଯାଇଛି । ଲୋକଙ୍କୁ PNG ସଂଯୋଗ ପାଇବା ପାଇଁ ମଧ୍ୟ ଉତ୍ସାହିତ କରାଯାଉଛି । କିଛି ଦିନ ତଳେ କେନ୍ଦ୍ର ସରକାର କିରୋସିନ ବିକ୍ରି ପାଇଁ ଏକ ଗେଜେଟ୍ ନୋଟିଫିକେସନ୍ ଜାରି କରିଛନ୍ତି । ଏହା ପରେ କେନ୍ଦ୍ର ପେଟ୍ରୋଲିୟମ ଏବଂ ପ୍ରାକୃତିକ ଗ୍ୟାସ ମନ୍ତ୍ରଣାଳୟ ୨୧ ଟି ରାଜ୍ୟ ଏବଂ କେନ୍ଦ୍ରଶାସିତ ଅଞ୍ଚଳରେ ପିଡିଏସ୍ ମାଧ୍ୟମରେ କିରୋସିନ ଯୋଗାଣ ପାଇଁ ନିର୍ଦ୍ଦେଶ ଦେଇଛନ୍ତି । ଭବିଷ୍ୟତରେ ଇନ୍ଧନ ଅଭାବକୁ ଏଡ଼ାଇବା ଲକ୍ଷ୍ୟରେ ୬୦ ଦିନ ପାଇଁ ରାସନ ଦୋକାନ ଏବଂ ପେଟ୍ରୋଲ ପମ୍ପରେ କିରୋସିନ ବିକ୍ରି କରାଯିବ ।