ଭୁବନେଶ୍ୱର,୧୩/୧୦: ଧଳା ଚାଦରରେ ଘୋଡ଼େଇ ହୋଇଛି ଖୋର୍ଦ୍ଧା। ଚାରିଆଡ଼େ କୁହୁଡ଼ି ଆଉ କୁହୁଡ଼ି। ରାସ୍ତାଘାଟଠାରୁ ଆରମ୍ଭ କରି ଚାଷଜମି ପର୍ଯ୍ୟନ୍ତ ସବୁଠି ଘନ କୁହୁଡ଼ିର ଆସ୍ତରଣ। ସକାଳୁ ସକାଳୁ ଖୋର୍ଦ୍ଧା ଜିଲ୍ଲାରେ ଦେଖିବାକୁ ମିଳିଛି ଏଭଳି ମନୋରମ ଦୃଶ୍ୟ। ବର୍ଷର ପ୍ରଥମ କୁହୁଡ଼ି ସାଙ୍ଗକୁ ଶୀତର ଆଗମନୀ ବାର୍ତ୍ତା ପାଇଛନ୍ତି ଜିଲ୍ଲାବାସୀ। ତେବେ ପ୍ରକୃତିର ଏହି ସୁନ୍ଦର ରୂପ ଗୋଟିଏ ପଟେ ଲୋକଙ୍କ ମନ ମୋହୁଥିବା ବେଳେ ଅନ୍ୟପଟେ ଘନ କୁହୁଡ଼ି ଯୋଗୁଁ ଯାତାୟାତରେ ସମସ୍ୟା ସୃଷ୍ଟି ହୋଇଛି। ଆଜି ଭୋର୍ରୁ ଖୋର୍ଦ୍ଧା ଜିଲ୍ଲାର ବିଭିନ୍ନ ଅଞ୍ଚଳ କୁହୁଡ଼ିରେ ଆଚ୍ଛାଦିତ ହୋଇପଡ଼ିଥିଲା। ରାସ୍ତା ଉପରେ ଏତେ ମାତ୍ରାରେ କୁହୁଡ଼ି ଜମି ରହିଥିଲା ଯେ ଆଗକୁ ଦେଖିବା କଷ୍ଟକର ହୋଇପଡ଼ିଥିଲା। ଫଳରେ ଯାନବାହନ ଚଳାଚଳ ପ୍ରଭାବିତ ହୋଇଥିଲା। ସକାଳୁ ଘରୁ ବାହାରିବା ମାତ୍ରେ ଧଳା ଚାଦର ତଳେ ଘୋଡ଼େଇ ହୋଇଥିବା ପ୍ରକୃତିର ଅପୂର୍ବ ଦୃଶ୍ୟ ଲୋକଙ୍କୁ ବେଶ୍ ଆକର୍ଷିତ କରୁଛି। ସବୁଜ ଚାଷଜମି ଉପରେ କୁହୁଡ଼ିର ଆସ୍ତରଣ ପରିବେଶକୁ ଆହୁରି ମନୋରମ କରିଦେଇଛି। ଶୀତ ଋତୁ ଆସିବା ପୂର୍ବରୁ ଏଭଳି କୁହୁଡ଼ି ପରିବେଶରେ ଏକ ଭିନ୍ନ ଅନୁଭୂତି ଆଣିଦେଇଛି। ତେବେ ଏହି କୁହୁଡ଼ି ଶୀତର ଆଗମନକୁ ନେଇ ଚର୍ଚ୍ଚା ବଢ଼ାଇଛି। ଆଗକୁ ତାପମାତ୍ରା କମିବା ସହ ଶୀତର ପ୍ରକୋପ ବଢ଼ିବ କି ନାହିଁ, ତାହା ପାଣିପାଗର ଗତିବିଧି ଉପରେ ନିର୍ଭର କରିବ। ଘନ କୁହୁଡ଼ି ଯୋଗୁଁ ଦୂରରୁ ଆସୁଥିବା ଗାଡ଼ିକୁ ଦେଖିବା ମଧ୍ୟ କଷ୍ଟକର ହୋଇପଡ଼ିଥିଲା।