ନୂଆଦିଲ୍ଲୀ,୨୫/୦୩: ଭାରତରେ ସୋସିଆଲ ମିଡିଆ, ଡେଟିଂ ଆପ୍ ଓ ଅନଲାଇନ୍ ଗେମିଂ ପ୍ଲାଟଫର୍ମ ବ୍ୟବହାର କରିବାର ଶୈଳୀରେ ବଡ଼ ଧରଣର ପରିବର୍ତ୍ତନ ଆସିବାକୁ ଯାଉଛି। ବ୍ୟାଙ୍କ ଆକାଉଣ୍ଟ କିମ୍ବା ସିମ୍ କାର୍ଡ ପରି ଏବେ ଏହି ସବୁ ଡିଜିଟାଲ ପ୍ଲାଟଫର୍ମରେ ନିଜର ପରିଚୟ ପ୍ରମାଣିତ କରିବା ପାଇଁ KYC ପ୍ରକ୍ରିୟା ବାଧ୍ୟତାମୂଳକ ହୋଇପାରେ। ସାଇବର ଅପରାଧ ରୋକିବା ଏବଂ ବିଶେଷ କରି ମହିଳା ଓ ଶିଶୁମାନଙ୍କ ଅନଲାଇନ୍ ସୁରକ୍ଷାକୁ ସୁନିଶ୍ଚିତ କରିବା ପାଇଁ ଏକ ସଂସଦୀୟ କମିଟି, ଆଇଟି ଏବଂ ଗୃହ ମନ୍ତ୍ରଣାଳୟକୁ ଏହି ଗୁରୁତ୍ୱପୂର୍ଣ୍ଣ ସୁପାରିଶ କରିଛି। ଯଦି ଏହି ପ୍ରସ୍ତାବ ଗୃହୀତ ହୁଏ, ତେବେ ବ୍ୟବହାରକାରୀଙ୍କୁ ନୂତନ ଆକାଉଣ୍ଟ ଖୋଲିବା କିମ୍ବା ଲଗ୍-ଇନ୍ କରିବା ପୂର୍ବରୁ ସରକାରୀ ପରିଚୟ ପତ୍ର ମାଧ୍ୟମରେ ନିଜର ସତ୍ୟତା ପ୍ରତିପାଦନ କରିବାକୁ ପଡ଼ିବ। ବର୍ତ୍ତମାନ ସମୟରେ ନକଲି ଆକାଉଣ୍ଟ ମାଧ୍ୟମରେ ସାଇବର ଷ୍ଟକିଂ, ହଇରାଣ କରିବା ଓ ଆର୍ଥିକ ଠକେଇ ଭଳି ଘଟଣା ବୃଦ୍ଧି ପାଉଛି। କମିଟିର ମତ ଅନୁଯାୟୀ, ଅନେକ ସମୟରେ ଅପରାଧୀମାନେ ନିଜ ପରିଚୟ ଲୁଚାଇ ମହିଳା ଓ ପିଲାମାନଙ୍କୁ ଟାର୍ଗେଟ୍ କରିଥାନ୍ତି । KYC ବ୍ୟବସ୍ଥା ଲାଗୁ ହେଲେ ପ୍ରତ୍ୟେକ ଆକାଉଣ୍ଟ ଜଣେ ପ୍ରକୃତ ବ୍ୟକ୍ତିଙ୍କ ସହ ସଂଯୁକ୍ତ ରହିବ। ଯେତେବେଳେ ବ୍ୟବହାରକାରୀ ଜାଣିବେ ଯେ ସେମାନଙ୍କୁ ସହଜରେ ଟ୍ରାକ୍ କରାଯାଇପାରିବ, ସେତେବେଳେ ଅପରାଧିକ କାର୍ଯ୍ୟକଳାପରେ ହ୍ରାସ ଘଟିବ ବୋଲି ଆଶା କରାଯାଉଛି।