ଭୁବନେଶ୍ୱର,୨୮/୦୬: ଫ୍ରାନ୍ସର ପୂର୍ବାଞ୍ଚଳ ସ୍ଥିତ ଟୋମ୍ବଲେନ୍ ସହରରେ ଏକ ବେସାମରିକ ବିମାନ ଦୁର୍ଘଟଣାଗ୍ରସ୍ତ ହୋଇଛି। ଦୁର୍ଘଟଣା ଘଟି ୧୧ ଜଣ ଲୋକଙ୍କ ମୃତ୍ୟୁ ହୋଇଛି। ଟୋମ୍ବଲେନ୍ ଦୁର୍ଘଟଣାକୁ ଫ୍ରାନ୍ସର ଚଳିତ ବର୍ଷର ଏକ ବଡ଼ ବିମାନ ଦୁର୍ଘଟଣା ଭାବେ ଗ୍ରହଣ କରାଯାଉଛି। ଟୋମ୍ବଲେନ୍ର ବିମାନବନ୍ଦର ନିକଟରେ ବିମାନଟି ଖସିପଡ଼ିବାରୁ ପୁଲିସ ସେହି ଅଞ୍ଚଳକୁ ଘେରାବନ୍ଦୀ କରିଥିଲା ଓ ଜରୁରୀକାଳୀନ ଦଳ ଉଦ୍ଧାର କାର୍ୟ୍ୟ ଆରମ୍ଭ କରିବା ସହିତ ଦୁର୍ଘଟଣାସ୍ଥଳକୁ ନ ଯିବାକୁ ଜନସାଧାରଣଙ୍କୁ ଅନୁରୋଧ କରିଛନ୍ତି। ସ୍ଥାନୀୟ ଗଣମାଧ୍ୟମ ରିପୋର୍ଟ ଅନୁଯାୟୀ, ବିମାନଟି କିଛି ଲୋକଙ୍କୁ ନେଇ ସ୍କାଏଡାଇଭିଂ ଯାତ୍ରାରେ ଯାଉଥିବା ବେଳେ ଦୁର୍ଘଟଣାଗ୍ରସ୍ତ ହୋଇଥିଲା। କର୍ତ୍ତୃପକ୍ଷ ଏପର୍ୟ୍ୟନ୍ତ ଦୁର୍ଘଟଣାର କାରଣ ନିଶ୍ଚିତ କରିନାହାନ୍ତି। ବିମାନଟି ଏକ ପାରାଚୁଟ ପ୍ରଶିକ୍ଷଣ ସ୍କୁଲର ହୋଇଥିବାବେଳେ ଏଥିରେ ଜଣେ ପାଇଲଟ, ୫ ଜଣ ପ୍ରଶିକ୍ଷକ ଓ ୫ ଜଣ ପ୍ରଶିକ୍ଷାର୍ଥୀ ଥିଲେ। ଫ୍ରାନ୍ସର ଆଭ୍ୟନ୍ତରୀଣ ମନ୍ତ୍ରୀ ଦୁର୍ଘଟଣାସ୍ଥଳ ଗସ୍ତ କରିବେ ବୋଲି ମନ୍ତ୍ରଣାଳୟ ପକ୍ଷରୁ କୁହାଯାଇଛି।