ନୂଆଦିଲ୍ଲୀ, ୧୯/୦୪: ପଶ୍ଚିମ ଏସିଆରେ ଜାରି ରହିଥିବା ସାମରିକ ସଂଘର୍ଷ ଯୋଗୁଁ ଭାରତର ଶକ୍ତି ବଜାର ଗମ୍ଭୀର ଭାବେ ପ୍ରଭାବିତ ହୋଇଛି। ଯାହାଫଳରେ ମାର୍ଚ୍ଚ ମାସରେ ରନ୍ଧନ ଗ୍ୟାସ୍ (ଏଲପିଜି) ବ୍ୟବହାରରେ ୧୩% ର ବୃହତ୍ ହ୍ରାସ ରେକର୍ଡ କରାଯାଇଛି। ସରକାରୀ ତଥ୍ୟ ଅନୁଯାୟୀ, ହର୍ମୁଜ ପ୍ରଣାଳୀ ଅସ୍ଥିର ରହିବା କାରଣରୁ ଯୋଗାଣ ବାଧାପ୍ରାପ୍ତ ହୋଇଛି, ଯାହାଫଳରେ ଗୃହର ଚାହିଦା ପୂରଣ କରିବା ପାଇଁ ସରକାର ହୋଟେଲ ଓ ଶିଳ୍ପ ସଂସ୍ଥା ଭଳି ବାଣିଜ୍ୟିକ ବ୍ୟବହାରକାରୀଙ୍କ ଏଲପିଜି କୋଟାରେ ବ୍ୟାପକ କାଟ୍ କରିଛନ୍ତି। ମାର୍ଚ୍ଚ ମାସରେ ମୋଟ ଏଲପିଜି ବ୍ୟବହାର ୨.୩୭୯ ମିଲିୟନ ଟନକୁ ଖସି ଆସିଛି, ଯାହା ଗତବର୍ଷ ଏହି ସମୟ ତୁଳନାରେ ୧୨.୮% କମ୍। ଏହି ସଙ୍କଟ ସତ୍ତ୍ୱେ ପେଟ୍ରୋଲ ଓ ଡିଜେଲ ଚାହିଦାରେ ପ୍ରାୟ ୮% ବୃଦ୍ଧି ପରିଲକ୍ଷିତ ହୋଇଛି। ଭାରତ ନିଜର ଏଲପିଜି ଆବଶ୍ୟକତାର ପ୍ରାୟ ୬୦% ଆମଦାନୀ ଉପରେ ନିର୍ଭର କରିଥାଏ, ଯାହାର ମୁଖ୍ୟ ଅଂଶ ହର୍ମୁଜ ପ୍ରଣାଳୀ ଦେଇ ଆସିଥାଏ। ଆମେରିକା ଓ ଇସ୍ରାଏଲର ଆକ୍ରମଣ ଏବଂ ଇରାନର ପ୍ରତିଶୋଧମୂଳକ କାର୍ୟ୍ୟାନୁଷ୍ଠାନ ଯୋଗୁଁ ସାଉଦି ଆରବ ଓ ୟୁଏଇରୁ ଯୋଗାଣ ବାଧାପ୍ରାପ୍ତ ହୋଇଛି। ପେଟ୍ରୋଲିୟମ ମନ୍ତ୍ରଣାଳୟର (ପିପିଏସି) ତଥ୍ୟ ଅନୁଯାୟୀ, ଘରୋଇ ଏଲପିଜି ସିଲିଣ୍ଡର ବିକ୍ରିରେ ୮.୧% ହ୍ରାସ ଘଟିଥିବା ବେଳେ ବାଣିଜ୍ୟିକ ବ୍ୟବହାରକାରୀଙ୍କ କ୍ଷେତ୍ରରେ ଏହା ପ୍ରାୟ ୪୮% ଏବଂ ବଲ୍କ ଏଲପିଜି କ୍ଷେତ୍ରରେ ୭୫.୫% ର ବଡ଼ ହ୍ରାସ ଘଟିଛି।