ନୂଆଦିଲ୍ଲୀ,୦୩/୧୦: ଏସୀୟ କ୍ରୀଡ଼ାରେ ଇତିହାସ ରଚିଲା ଭାରତ । କ୍ରିକେଟରେ ଲଗାତାର ଦ୍ୱିତୀୟ ଥର ଭାରତ ସ୍ୱର୍ଣ୍ଣ ପଦକ ଜିତିଛି । ପାକିସ୍ତାନକୁ ୧୯ ରନ୍ରେ ପରାସ୍ତ କରି ଭାରତ ଏସିଆନ୍ ଗେମ୍ସରେ ସ୍ୱର୍ଣ୍ଣ ପଦକ ଜିତିଛି । ଫାଇନାଲରେ ଭାରତର ବ୍ୟାଟିଂ ଓ ପରେ ବୋଲରଙ୍କ ଲଢ଼ୁଆ ପ୍ରଦର୍ଶନ ଦଳକୁ ଚାମ୍ପିଅନ୍ କରିଛି । ଭାରତ ଦେଇଥିବା ୨୧୨ ରନ୍ର ଟାର୍ଗେଟ୍ର ପିଛା କରି ପାକିସ୍ତାନୀ ଦଳ ନିର୍ଦ୍ଧାରିତ ଓଭରରେ ଲକ୍ଷ୍ୟ ହାସଲ କରିପାରିନଥିଲା। ପାକିସ୍ତାନ ପକ୍ଷରୁ ହସନ ନୱାଜ ଜବରଦସ୍ତ ବ୍ୟାଟିଂ କରି ୯୬ ରନ୍ର ଲଢ଼ୁଆ ଇନିଂସ ଖେଳିଥିଲେ । ଶେଷ ପର୍ଯ୍ୟନ୍ତ ସେ ଭାରତୀୟ ବୋଲରଙ୍କୁ ଚ୍ୟାଲେଞ୍ଜ ଦେଇଥିଲେ । ମାତ୍ର ନିଜ ଶତକଠାରୁ ମାତ୍ର ୪ ରନ୍ ଦୂରରେ ତାଙ୍କ ଇନିଂସର ଅନ୍ତ ଘଟିଥିଲା । ଭାରତ ପକ୍ଷରୁ ଶିବମ ଦୁବେ ଶେଷ ଓଭର ବୋଲିଂ କରିଥିଲେ । ଓଭରର ଶେଷ ବଲ୍ରେ ହସନ ନୱାଜଙ୍କୁ ଆଉଟ୍ କରି ଦୁବେ ଭାରତର ବିଜୟ ନିଶ୍ଚିତ କରିଥିଲେ। ହସନଙ୍କ ଲଢ଼ୁଆ ୯୬ ରନ୍ ସତ୍ତ୍ୱେ ପାକିସ୍ତାନ ଭାରତର ଦିଆ ବିଜୟ ଲକ୍ଷ୍ୟ ଅତିକ୍ରମ କରିପାରିନଥିଲା । ଟସ୍ ଜିତି ପ୍ରଥମେ ବ୍ୟାଟିଂ କରିଥିବା ଭାରତ ପାଇଁ ଅଭିଷେକ ଶର୍ମା ଓ ୧୫ ବର୍ଷୀୟ ବୈଭବ ସୂର୍ଯ୍ୟବଂଶୀ ଇନିଂସ୍ ଆରମ୍ଭ କରିଥିଲେ।